這麼近·那麼遠
最近同閨蜜嘉菲貓食生日飯，佢突然話：「我有啲嘢想同你講。」
心諗：唔通有咗？
「你想移民啊？」最近咁多人講呢個topic。
「係啊，我就嚟移民。」
當吓我呆咗，無諗過自己最好嘅朋友會移民，而且唔係「想」咁簡單，係「就嚟」，聽完真係好想喊出嚟。
我表現得好冷靜，但其實內心好矛盾，有好多複雜情感同時湧現：唔捨得，因為怕以後無機會見面；戥佢開心，可以追尋自己理想生活；擔心，會唔會去到嗰邊唔適應......
「哦，咁你諗住去邊啊？」
「加拿大。」
我知道嘉菲貓係一個比我有更堅強意志嘅人，決定咗嘅事，就會行動。傾吓傾吓，就知道佢已經安排咗好多細節，打算先過嗰邊讀書，再搵工等等。唔似得大部份人把口話走，但一直無計劃過。
佢，真係要走了。
由中學到而家，識咗十幾年嘅好姊妹，突然間會離開你生活嘅地方，個種感覺有啲似...有啲似失戀，但內心又有啲安慰，想佢有更好嘅生活。
「你嗰邊有無親友照應？」
「無㗎，靠自己。」
望著心口掛著個「勇」字嘅佢，我眼神好疑惑。佢好似明我想問咩，繼續話：「你知我走嘅原因係因為政見啦。」
「我明啊，總之respect你嘅決定！」
席間談到佢嘅家人，其實最放唔低嘅唔係工作、生活，而係屋企人。而做父母嘅，縱有千般不捨，最終都會支持仔女嘅選擇。
「咁你隻貓點啊？」
「我會帶埋佢過去㗎，我已經搵咗資料，點申請佢過去......」
我真係好佩服嘉菲貓，佢已經做好充足嘅準備，重新出發。第時移咗民，唔知我哋幾時先可以再見面？一諗到呢度，已經忍唔住流馬尿。
凡事都有定期，天下萬務都有定時。生有時，死有時；希望我哋分離有時，重聚有時。
一路順風，同埋加油💪🏻❤️
Search